صبة الدكتور عادل عبد المهدي
ابو احمد المحمود
حوار مواطن مع صبة الدكتور عادل عبد المهدي في الكرادة:
(و الصبة لمن لا يعرف الصبة هي تلك الكتلة الكونكريتية المقيتة التي تقف منتصبة في شارع الكرادة كحجر عثرة اما الاف السيارات متسببة بهدر ملايين الدنانير على شكل و قود و اعصاب و وقت في حر و برد العراق المتطرفان)
وقفت امامها يوما و فاجئتني تهمس في اذني فالتفت فلم ارى الا كتلة من الاسمنت و عدت و عاد الهمس فالتفت فلم ارى الا ما رايت في المرة الاولى و زادت حيرتي و عدت الى وضعي وسمعت الهمس للمرة الثالثة فسميت و التفت و قلت في نفسي من انت فجائني الصوت شبيك هذا اني ما شوفني فقلت في نفسي انى لا ارى سوى الصبة فجاء الصوت : اي هوة اني الصبة. فتفاجئت و دار بيننا هذا الحديث :
الصبة : حارة مو
انا : بس حارة تكتل كنل و ازدحام و السيارة صعدت حماوتها و خبطت مي ودهن
الصبة : مو بس انتة عشرات بشكلك اشوفهم يومية
انا : غير كلة من وراج
الصبة : منوراي شنو عيني اني شعلية
انا : لو مو انتي جان ماكو ازدحام و جان الطريق يمشي و متصعد الحماوة
الصبة : اي صحيح بس اني شعلية
انا : مو انت سادة الطريق (بصوت عال)
الصبة : اني شعلية لصيح قابل اجيت مشي غير همة جابوني
انا : ياهمة ؟
الصبة : جماعة الدكتور
انا : يادكتور ؟
الصبة : شبيك دكتور عادل عبد المهدي
انا : معقولة .؟؟؟؟ والله لو يدري الدكتور ؟
الصبة : ايباخ ………..لعد شلون الدكتور ميدري مو بباب بيتة ؟
انا : اي بباب بيتة بس اني متاكد ميدري لان اني اعرف الدكتور خوش انسان و ميرضة باذية العالم
الصبة : انتة تضحك على نفسك ؟ شلون ميدري موهذا بيتة مو ذولي حمايتة و ثم تعال اكلك يدري ميدري متفرق
انا : شلون؟؟؟
الصبة : هو مو سياسي و احنا مو نظام ديمقراطي وراس مال السياسي هو ارضاء الناس على مود ينتخبو
انا : كل كلامك صحيح
الصبة : اذا صحيح غير ينتبه لهاي القضية و يحاول يبعد نفسة عن اثارة امتعاض العالم الي المفروض راح يحتاج اصواتهم بعد شكم يوم مو يحرق اعصابهم
انا : بس الدكتور مجاهد لسنين طويلة و حمل قضية العرق سنين و هو هم عراقي اصيل مثلنة اكيد ميرضة اي عراقي يتاذئ
الصبة : هاي اشبيك انت هم مصدك عمي السياسين بالعراق مثل الاطفال ميعرفون بس ياخذون و يتجاوزن على كل شي على مود اشياء تافهة شوف هذا الدكتور صاحبك الي تدافع عنة شوف المتر الماخذة من الشارع شفايدة صدكني كلشي ما فايدة بس شوف العالم شكد متاذايين من ورة هل المتر الاكشر
انا : شلون ما فايدة غير الرجل مستهدف
الصبة : عمي مستهدف على راسي بس شيصير لو يخلوني على الرصيف بس شوف ماكو كل فرق و السيارات تكدر تفوت
(فنضرت فعلا يوجد متسع على الرصيف)
انا : اي بس السياسي كلشي يكدر يسوي
الصبة : كلامك صحيح لكن بس بالعراق اصور انه بلير يخلي هجي صبة بشكلي بلندن موجان خلوهة ........استغفر الله و الله الحجي يضوج
انا : لا انت ضايجة من الدكتور
الصبة : شكد انتة متفتهم اني صبة يعني ما اضوج بسهولة بس يا اخي سياسيكم ضوجوني سنين النضال و الجهاد و التعب و الاف الشهداء كاها ضيعوها باشياء تافهة و هاك اني على سييل المثال صبة مخليني بنص الشارع هسا الخلاني ما كال هاي الناس شلون تمر ماكال خطية العالم اني ساد عليها الطريق ماكال اني البيت اصلا ماكاعد بيه لويش اسد الشارع على العالم
انا : شوفي هواي من كلامك صحيح بس انت ضايجة من الدكتور
الصبة : لك شلون ما اضوج على هيجي بلد سياسينا ما يفكرون بس بنفسهم لك سياسيكم ما نسمع بس المشاكل منهم و على سبيل المثال اني شيسموني
انا : شيسموك؟
الصبة : يسموني صبة الدكتور عادل عبد المهدي بس بشرفك شكد حلو لو جان اسمي مثلا مستشفى الدكتور عادل عبد المهدي لو مدرسة الدكتور عادل عبد المهدي لوجامعة الدكتور .....
انا : كافي كافي انشاء الله يصيرالعراق و ينبني بصورة صحيحة و تنشالين و اخلص منك
الصبة : شلون صيرون بسياسيكم المحتاريين بتعديل رواتبهم لو باحزابكم الي ماكدت تبني الها مقرات و كاعد بالحواسم راح تبنيلكم و طن؟ انت تعبان و العراق كلة تعبان
انا : احترمي نفسك اني مو تعبان والعراق مو تعبان و انشاء الله اني راح اكل للدكتور على كلامك و انشاء الله راح يشمرك لبعيد و يخلصنة منج (كان كلامي هذا بصوت عال جدا اثار انتباه صديقي)
صديقي : (مستغرباً)ها شبيك و يامن تحجي؟
انا : وية هاي الصبة تحجي على رموزنا الوطنية
صديقي : الصبة
اي االصبة
تعال عيني خلي النروح اشتغلت السيارة الظاهر انت هم خبطت
(هذا نوع من الفنتازيا السياسية ارجو ان لا تعتبر اساءة لاحد خاصة السيبد الدكتور عادل عبد المهدي ذلك الشخص الدمث الخلق و الوطني المتفاني و لكنها كلمات في قلبي منذ ايام قالتها بدلا عني صبة الدكتور عادل عبد المهدي و هي ليست الوحيدة التي ستتكلم فهناك صبات و شوارع مسدوة و مربعات امنية و غيرها كثير ارجو ان تتكلو ولكن بصوت خافت ليسمعه الجميع شكرا ً للقارئ و اعتذر عن الاطالة)
هناك تعليق واحد:
ههههههههههههههه طلعت مثل نيلز تحجي ويا الصبات خخخ
و لا يهمك يا استاذ علي، إن شاء الله يجي يوم الصبات تبجي ما لاكية أحد يحطها بالشارع
تقبل تحياتي
إرسال تعليق